Author: Joe Sanders

Tha LAS 2023, cothrom taic do sgrìobhadair stèidhichte, fosgailte do sgrìobhadairean Gàidhlig a tha a’ tòiseachadh no ag obair air pròiseact cudromach. Tòisichidh taic tro LAS 2023 anns an Fhaoilleach an ath bhliadhna, agus mairidh an taic eadar naoi mìosan agus bliadhna, a-rèir feumalachdan an sgrìobhadair.

Faodaidh tu tagradh a chur a-steach, ma tha thu:

• Stèidhichte ann an Alba
• Fileanta ann an Gàidhlig
• Nad sgrìobhadair rosg (ficsean/neo-fhicsean), neach-dèanamh chomaigean, bàrd, sgeulaiche, dealbhadair neo dràmadair (Bu chòir do dhràmadairean a tha a’ coimhead airson taic le obair theatair, coimhead ri cothroman a tha rim faotainn aig Stiuidio Dhràmadairean Alba).
• Coileanadh shlatan-tomhais airson sgeama Urras Leabhraichean na h-Alba Litreachas Beò (‘Live Literature’). Chan fheum thu a bhith clàraichte air ‘Live Literature’, dìreach coileanadh nan slatan-tomhais.

An taic:

• Program de thaic subailte
• Taic-airgid £2,000
• Trèanadh pròifeasanta (sùil air a’ phròiseact agad, taic a thaobh trèanadh ann am PR agus margaidheachd)
• Seachdain sgrìobhaidh aig Moniak Mhor

Tagraidhean:

Cuir do thagradh a-steach air post-d gu [email protected] le ‘Comhaltachd Ignite 2023: D’ ainm’ san loidhne cuspair. Tha tuilleadh fiosrachaidh air ciamar a nithear tagradh ri fhaighinn bho làrach-lìn Urras Leabhraichean na h-Alba.

Ceann-latha airson tagraidhean: ro mheadhan-latha, Diciadain 14 an t-Sultain 2022.

Dàn le Bàrd Oifigeil a’ Chomuinn Ghàidealaich, Rody Gorman airson an 80mh co-latha breith aig sàr-bhàrd agus sgrìobhadair òrain, Aonghas Dubh MacNeacail a chomharradh.

Do Aonghas Dubh Là na h-Aoise

Fhir-dhàna ’s ollaimh ri filidheachd,
Seadh, agus ri seanchas
Is ealain a tha thu ann,

A cheist is a chuspair
A bhuain aois a’ gheallaidh
’S t’ anam dubh dubh gun sgur

Agus do shùilean beò nan lasair
Nad shuidhe sa chnoc a’ sealltainn a-mach
Air an Eilean ’s na Crìochan ’s Leum na Caillich,

An dèidh dhut èirigh ’s falbh
Agus an obair mhòr agad
Is an dreuchd ud a leigeil a-nuas

Mu dheireadh thall ’s a-bhos
Is na leabhraichean a chur an dara taobh
Mar a dhèanadh na linn am bodach

Na aon luaireagan beag air teòradh,
A chiall, ris a’ bhlàths a-staigh,
Cha chreid mi nach fhàg sinn,

Mar chuimhneachan ’s mar chomharradh,
A’ chathair agad thall ud
Bàn ’s falamh gu Là Luain.

’S e muinntireas ùr làn-mhaoinichte do sgrìobhadairean Gàidhlig eadar 18 agus 25 a th’ anns a’ Mhuinntireas do Sgrìobhaiche Gàidhlig. Bidh am muinntireas dà sheachdain seo a’ tachairt eadar Diluain 29 Lùnastal agus Didòmhnaich 11 Sultain 2022, agus gheibh an tagraiche soirbheachail tuarastal, cuibhreann siubhail is rannsachaidh, agus comhairleachadh aon-ri-aon le ùghdar Gàidhlig stèidhichte. Is e an ceann-latha airson tagraidhean Diluain 20 Ògmhios (aig meadhan oidhche).

Is e muinntireas ùr a tha seo a tha air a mhaoineachadh le Comhairle nan Leabhraichean agus air a chruthachadh ann an co-obrachadh le Cove Park.

Ceann-latha airson tagraidhean: Diluain 20 Ògmhios 2022 (meadhan-oidhche)

Ùidh agaibh ann am foillseachadh Gàidhlig?

Sgoilearachd foillseachaidh maoinichte, ann an Gàidhlig na h-Alba, airson a’ chùrsa MLitt ann am Foghlam Foillseachaidh, Oilthigh Shruighlea, 2022-23.

Air a chur air dòigh le Comhairle nan Leabhraichean ann an co‑bhonn ri Ionad Shruighlea airson Foillseachadh is Conaltradh Eadar-nàiseanta ann an Oilthigh Shruighlea.

A’ tòiseachdain Sultain 2022, ann an Sruighlea fhèin.

Ma tha ùidh agaibh sa sgoilearachd seo, cuiribh brath gu John Storey.

Neo ma tha sibh airson tuilleadh fiosrachaidh mun chùrsa fhaighinn, thoiribh sùil air làrach-lìn Oilthigh Sruighlea an seo.

Bidh tuilleadh fiosrachaidh mun Sgoilearachd seo ga fhoillseachadh air làrach-lìn Chomhairle nan Leabhraichean aig deireadh a’ Chèitein 2022.

Tha Luath Press air a bhith a’ foillseachadh ficsean Gàidhlig fon ainm FICSEAN LUATH fad ceithir bliadhna a-nis. Tha an sreath ùr seo a’ dol bho neart gu neart.

Tha Luath toilichte cuireadh a thoirt do sgrìobhadairean ficsein ann an Gàidhlig na h-Alba: nobhailean, neo molaidhean air nobhailean, a chur a-steach airson foillseachadh ann an 2023 air adhart. Bithear a’ beachdachadh air cruinneachaidhean de sgeulachdan goirid Gàidhlig cuideachd. Ma tha thu nad ùghdar le nobhail Gàidhlig do dh’inbhich (30,000 facal de dh’fhaid aig a’ char as giorra agus 100,000 facal aig a’ char as fhaide), bhitheamaid toilichte cluinntinn bhuat!

Thathar ag amas air co-dhiù dà nobhail Ghàidhlig fhoillseachadh a h-uile bliadhna.

Cuideachd, mura h-eil an nobhail/cruinneachadh sgeulachdan Gàidhlig agad deiseil fhathast ach ma tha thu a’ miannachadh foillseachadh ann an 2023/24 air adhart, bhitheamaid airson cluinntinn bhuat cuideachd. Cuir a-steach na th’ agad!

Airson barrachd fiosrachaidh, cuir fios gu Joan Nicdhòmhnaill, Àrd Neach-deasachaidh Ficsean Luath.

NEO cuir fòn gu Oifis Luath Press air 0131 225 4326 (faighnich airson Gavin MacDougall – Beurla a mhàin)

Ceann-latha: Diluain 01 an Lùnastal 2022.

Pròiseact FICSEAN LUATH ann an co-bhonn ri Comhairle nan Leabhraichean.

 

* Thèid gach tagradh a chumail dìomhair. Bi mothachail: chan urrainn dhuinn gealltanas a thoirt dhut gun tèid d’ obair fhoillseachadh, agus tha am prògram foillseachaidh againn airson nobhailean Gàidhlig cuingealaichte gu 2-3 nobhail gach bliadhna. Mura tèid gabhail ri do thagradh, gu mì-fhortanach, chan urrainn dhuinn a dhol an sàs ann an deasbaireachd.

Tha Alasdair C. Whyte air chuairt an-dràsta sna h-eileanan a’ bruidhinn air an leabhar iongantach aige, Maim-slè. Dèan cinnteach gum faigh sibh cothrom a bhith aig tachartas!

Tha Duaisean nan Sgrìobhadairean Ùra Gàidhlig 2023 a-nis fosgailte do thagraidhean, prògram bliadhnail air a thabhainn le Comhairle nan Leabhraichean ann an co-bhonn le Urras Leabhraichean na h-Alba.

Ceann-latha: 12f, Diciadain 13 Iuchar 2022

Lorgar fiosrachadh air ciamar a chuirear a-steach tagradh an seo air làrach-lìn Urras Leabhraichean na h-Alba.

Tha e an-asgaidh cur a-steach airson nan duaisean agus gheibhte cosgaisean siubhail gu lèir air ais. Thèid an luchd-buannachaidh a thaghadh le pannail de bhritheamhan. Is mathaid gum faodadh taic a bharrachd a bhith ann do luchd-buannachaidh air a bheil bacaidhean a thaobh a bhith a’ gabhail pàirt.

Bidh na Duaisean a’ ruith eadar Am Faoilleach 2023 agus Am Faoilleach 2024. Gheibh an luchd-buannachaidh:

• Duais luach £2,000 an urra, mar thaic airson an cuid sgrìobhaidh mar is iomchaidh dhaibh
• Taic leasachaidh cruthachail fa leth, mar eisimpleir, stiùireadh bho sgrìobhadair stèidhichte no eòlaiche eile
• Trèanadh ann am margaidheachd, na meadhanan sòisealta agus sgilean taisbeanaidh
• Cothrom an cuid obrach a leughadh aig taisbeanadh do luchd-foillseachaidh
• Seachdain aig ionad-sgrìobhaidh, far am bi ùine, farsaingeachd agus saorsa airson obair ùr a chruthachadh (a rèir riaghailtean aig an àm)
• Ballrachd an-asgaidh fad bliadhna aig Comann nan Sgrìobhadairean agus seisean trèanaidh a thaobh chùmhnantan agus chòraichean.
• Àite an-asgaidh air cùrsa 3-latha airson sgilean deasachaidh Gàidhlig le teisteanas bho Oilthigh Caledonian Ghlaschu.
• Aig toiseach gnothaich, bidh trì mìosan aig na Sgrìobhadairean Ùra airson an cuid sgrìobhaidh ullachadh mus coinnich iad ri riochdairean bho Urras Leabhraichean na h-Alba agus bho Chomhairle nan Leabhraichean airson beachdachadh air an taic leasachaidh proifeiseanta a fhreagras orrasan gu pearsanta agus air a’ phròiseact aca.

Thèid Duaisean nan Sgrìobhadairean Ùra air adhart ann an 2023 ma gheibh Urras Leabhraichean na h-Alba am maoineachadh a tha a dhìth orra airson an sgeama a ruith. Thèid an t-seachdain-sgrìobhaidh air adhart a rèir riaghailtean agus stiùireadh air siubhal a rèir an t-suidheachaidh aig an àm.

Lorgar fiosrachadh air ciamar a chuirear a-steach tagradh an seo air làrach-lìn Urras Leabhraichean na h-Alba.

Ceistean sam bith? Cuiribh post-d gu [email protected].

 

 

Iomairt nan Clach

Shiubhail mi san Fhaoilinn leam fhìn gun bhacadh
Agus gaoth bhon ear a’ sracadh

Is faram nan tonn mu na sligean air a’ mhol
Bucha Makariv Mariupol

Far an cuireadh iad air iomairt nan clach
Kolomyya Bakhchysarai Backmach

Och ann an linn cogadh nan con
Hi ri ri Kharkiv Kherson

Is och nach b’ iad na fir
Kalush Poltava Staryi Sambir.

Chì mi na h-ògain air a’ Chnoc thall gam bogadh
Ò nàili bho hò  ’s na h-iseanan a’ gnogadh

Agus fo mo spòig an talamh bog
Mar bhlàr-mòna Kiliia Krivoy Rog

Is chì mi tè san sgàilean bhuam thall
Air m’ ais air a’ Chruard is fuil air a sgall

Agus na cuirp a’ fàs grod
Kaharlyk Tulchyn Myrhorod

Anns a’ bhuachar, a Dhia,
Chall èile Kaniv Zaporizhzia.

Uaireannan, is iad na ciad cheumannan sin ann an sgrìobhadh proifeiseanta as duilghe  – a’ cruthachadh làmh-sgrìobhainn agus a’ dèanamh ceangal ris a’ ghnìomhachas.

Ciamar a chuireas tu structar air do chiad leabhar? Dè na ceumannan a ghabhas tu gus a dheasachadh agus a leasachadh airson fhoillseachadh san àm ri teachd? Am bi luchd-leughaidh ann  don obair seo, agus cò iad na foillsichearan a bheir cuideachadh dhut leis an luchd-leughaidh sin a ruighinn?

Tha sgeama Ar Guthan ag amas air sgrìobhadairean Gàidhlig neo-fhoillsichte a chuideachadh: sgrìobhadairean aig a bheil sgrìobhadh a tha gu bhith deiseil ach nach eil fhathast air fhoillseachadh. Ged a tha e fosgailte do na h-uile a tha ag obair tro mheadhan na Gàidhlig, agus ag aithneachadh iomallachadh litreachas na Gàidhlig ann an Alba, tha sinn dealasach a thaobh tagraidhean a bhrosnachadh bho ghuthan fo-riochdaichte taobh a‑staigh coimhearsnachd na Gàidhlig – iadsan as dòcha aig nach eil cothrom air an t-seòrsa taic phroifeiseanta seo.

Tha sinn gu h-àraid a’ cur fàilte air tagraidhean bho sgrìobhadairean Gàidhlig neo‑fhoillsichte a tha a’ fuireach ann an coimhearsnachdan nan eilean, neo ann an àite air an dùthaich nach eil faisg air baile mòr.   Cuideachd, feadhainn a tha stèidhichte ann an Alba agus a tha ciorramach, LGBTQ+ (Leasbach, Gèidh, Dà-sheòrsach, Tar-ghnèitheach, Cuèir +), le eòlas san t-siostam cùraim, muinntir a tha gam meas fhèin mar Dhubh, Àisianach, neo Mion-Chinnidheach, agus/neo à dachaigh air teachd-a-steach ìosal.

Tha sinn a’ cur fàilte air iarrtasan bho dhaoine aig a bheil dìth-mhisneachd ceangailte ri sgrìobhadh ann an Gàidhlig (a thaobh cainnt, litreachadh neo adhbharan eile). Thathar ag iarraidh air na tagraichean sin fios a chur gu Comhairle nan Leabhraichean gus cruth eile den tagradh, agus/no sampall sgrìobhaidh, obrachadh a‑mach, ma dh’fheumas iad.

Bruth an seo airson barrachd fiosrachaidh agus stiuireadh air cur a-steach tagradh.

Ceann-latha dùnaidh: 14 April 2022

 

Chaidh an Duais Ghàidhlig mar phàirt de Duaisean nan Sgrìobhadairean Ùra Urras Leabhraichean na h-Alba a bhuileachadh air Shelagh Chaimbeul. Tha Shelagh na pàirt de bhuidheann de deichnear sgrìobhadairean ùra a chaidh a thaghadh airson an sgeama, a gheibh taic le stiùireadh proifeiseanta gus an cuideachadh gluasad a dh’ionnsaigh foillseachadh. Maoinichte le Alba Chruthachail agus air a ruith le Urras Leabhraichean na h-Alba, tha na duaisean air taic a chur ri còrr air 140 neach cruthachail fa leth bho 2009.

Gheibh gach aon de na 10 buannaichean duais £2,000 agus taic a bhios freagarrach do am feumalachdan, a’ gabhail a-steach stiùireadh bho sgrìobhadairean agus proifeiseantaich gnìomhachais, cothroman trèanaidh, agus àrd-ùrlar airson an cuid obrach a thaisbeanadh do fhoillsichearan agus àidseantan.

Mu dheidheinn Shelagh

‘S ann à Glaschu a tha Shelagh agus bidh i a’ sgrìobhadh leabhraichean ficsean do chloinn agus do dh’inbhich sa Ghàidhlig. Thòisich i ag ionnsachadh na Gàidhlig ann an 2005 agus thòisich i a’ sgrìobhadh sa chànan cho luath ‘s a bha e comasach dhi dà seantans a chur ri chèile.

Bhuannaich i Duais Litreachais airson làmh-sgrìobhainn neo-fhoillsichte as fheàrr do chloinn ann an 2020 agus chaidh an sgrìobhadh aice fhoillseachadh san iris Northwords Now. Bidh i a’ stiùireadh seiseanan leughadh co-roinnte agus sgrìobhadh cruthachail sa Ghàidhlig gach mìos tro Open Book.

Tha i ag obair air nobhail eucoir stèidhichte ann an Cill Rìmhinn an-dràsta agus tha i taingeil gum faigh i cothrom a cuid sgrìobhaidh a leasachadh tron duais seo.

Thuirt Shelagh

‘Tha mi cho taingeil gu bheil mi air an duais seo fhaighinn. Chan eil e furasta do sgrìobhadair ùr eòlas fhaighinn air an t-slighe air adhart, agus tha mi fortanach gu bheil iomadh buannachd agus cothrom an lùib a’ phrògraim seo.’