Sradagan san Iarmailt: Pàdraig MacAoidh & Anna Frater

21 Cèitean 2026 6:00 pm

Thigibh còmhla rinn aig Leabharlann Hillhead airson tachartas bàrdachd cuide ri Bàrd a’ Chomuinn, Anna Frater, agus Makar na h-Alba, Pàdraig MacAoidh, a’ comharrachadh agus a’ còmhradh mun duanaire ùr Sradagan san Iarmailt (Francis Boutle Publishers, 2025).

Tha Sradagan san Iarmailt, air a dheasachadh le Marcas Mac an Tuairneir, a’ dèanamh taisbeanadh air buidheann tàlantach de bhàird na Gàidhlig, nam measg Anna Frater agus Pàdraig MacAoidh.

’S ann às An Rubha, Eilean Leòdhais a tha Anna Frater. Chaidh na dàin aice fhoillseachadh an toiseach ann an Gairm (1986) fhad ’s a bha i na h-oileanach aig Oilthigh Ghlaschu agus bhon uair sin nochd dà chruinneachadh aice, Fon t-Slige (Gairm, 1995) agus Cridhe Creige (Acair, 2017). Bha i a’ teagasg litreachas na Gàidhlig aig Colaiste a’ Chaisteil airson grunn bhliadhnaichean, agus ann an 2025, chaidh a crùnadh mar Bhàird a’ Chomuinn Ghàidhealaich aig Mòd Loch Abar.

Rugadh Pàdraig MacAoidh ann an Eilean Leòdhais far an deach a thogail le Gàidhlig agus Beurla. ’S e bàrd, sgrìobhadair, craoladair agus eadar-theangaiche a th’ ann a bhios a’ dèanamh ceangalan eadar dualchas na Gàidhlig agus cultaran eadar-nàiseanta. A bharrachd air a bhith na dheasaiche aig steall de leabhraichean litreachais, dh’fhoillsich e dà chruinneachadh den bhàrdachd aige fhèin, Gu Leòr (Acair, 2015) agus Nàdar De (Acair, 2020). Tha e na ollamh aig Oilthigh Chill Rìmhinn, far a bheil e a’ teagaisg litreachas, agus ann an 2024 chaidh ainmeachadh mar Mhakar na h-Alba.

Tha seòmar an tachartais air a’ chiad ùrlar aig Leabharlann Hillhead, agus chan eil lioft ann thuige.